彰化台語文創意園區辦詩畫展 推廣台語文學 https://youtu.be/17uc4iGDuc4?si=Yg6D2VlsRyDeY_3W 楊舒晴 / 彰化報導 長期推廣臺語的關懷文教基金會，佇台語文創意園區，舉辦李勤岸、顏聖哲的聯合詩畫展，用詩人李勤岸的台語詩，搭配顏聖哲的畫作，來推廣台語文學。文化部長李遠也到現場，伊講，文化部會支持對藝術、文學、電影、歌曲這寡方面，來推x語。（這則新聞標題、前言、內文為臺語文。） 詩人李勤岸寫的台語詩，閣搭配藝術家顏聖哲的圖畫，計共33幅的詩畫創作，這陣當佇咧台語文創意園區展出，詩中有畫、畫中有詩，呈現出特殊的意境，來推x語。 詩人李勤岸：「台語欲推廣，毋是干焦靠意識型態啦，咱需要靠足濟方式，譬如講佮圖來配合、佮歌來配合，有各種形式予逐家佮意這个物件。」 關懷文教基金會董事長周清玉：「用台語來將咱真濟地方的代誌，咱的感情、咱的價值、咱各種的故事，用詩句來展現，我想這是咱本土語言文化真好的表現。」 這遍的展覽也特別邀請文化部長李遠，來參加開幕儀式，李遠表示，二三十年前台語予人認為是較無水準的，但是這陣已經無仝，逐家拚勢欲來台語講倒轉來，雖罔台語無專門負責的單位，但是文化部會盡力支持台語的推廣 文化部長李遠：「干焦台語無專責單位，文化部這馬就是講對台語開始落去推廣，是毋是愛足濟園區無一定，因為推廣語言對我來講，變成藝術作品是上重要的，像這款詩啦、抑是講畫圖啦、抑是講電影啦、文學作品啦，對我來講，這種推廣是會永遠留落來的。」 李遠嘛講著，佇過去華語霸權的政策之下，予臺灣其他的語言，流失嚴重，無論是臺灣客語、臺灣原住民族語、臺灣台語，每一種語言攏是平等的，伊也認為用藝術創作的方式，會當予開展語言的推廣，就親像這遍詩畫展覽，用藝術作品呈現台語的優雅佮媠氣，予本土語言的文化，會當代代湠。 https://news.pts.org.tw/article/718034 -- ※ 發信站: 批踢踢實業坊(ptt.cc), 來自: 125.227.218.133 (臺灣) ※ 文章網址: https://www.ptt.cc/bbs/ChangHua/M.1728391990.A.4D5.html