公視新聞網 https://news.pts.org.tw/article/704476 國中辦文化體驗活動 tshuā學生認捌布袋戲文化 發布時間：2024-07-11 19:15 更新時間：2024-07-11 20:19 李晨宇 臺南報導 https://www.youtube.com/watch?v=e3m2CcBvlTw 臺南仁德文賢國中趁歇熱期間舉辦傳統文化體驗活動， tshuā囡仔認捌布袋戲文化的內 涵，嘛予in體會著布袋戲佮台語口白的媠。(本篇新聞標題、導言、內文皆為台文) 這仙穿藍色的衫兼提葵扇，是布袋戲內底的文生；抑若這仙三花笑常在會佇氣氛緊張的時 ，出來講笑詼化解危機。布袋戲攏總分成七大類的角色，為著予囡仔通認捌傳統文化，臺 南仁德文賢國中佇歇熱期間，特別邀請劇團來學校教囡仔掠尪仔的鋩角，頭擺接觸的囡仔 攏學甲歡頭喜面。 臺南市仁德文賢國中學生：「布袋戲是我第一改摸著的，真趣味。（你拄才有學著啥物件 )學著布袋戲按怎行路。」 臺南市仁德文賢國中校長 陳麗如：「咱看布袋戲是足正常，毋過這馬的囡仔來講，布袋 戲這个物件對in來講，有聽過、有看過，毋過伊無摸過。布袋戲內面有足濟種台詞，是足 媠的台語文化。」 這擺營隊，毋干焦予in看爾，嘛予學生動手練習按怎來掠尪仔。弄布袋戲的師傅講，每一 个角色咧行路的跤步手路，就愛閣參個性做配合。若欲予尪仔閣較有靈魂，上重要就是模 仿角色的講話氣口。劇團嘛攢出場詩，來予in體會台語文音佮白音的優雅。 小東國加掌中劇團教學推廣組長 林宣佑：「角色出現的時陣，伊有伊足特別的口白，伊 有唸詩嘛有口白，阮口白就教囡仔用台語來講。」 小東國加掌中劇團操偶師 楊裕農：「咱若欲傳承就是愛對上基層的，像講國小 國中對學 校向下釘根。我感覺按呢應該是一个較有法度去延續咱布袋戲文化傳承的方法。」 古早人常在看布袋戲做議量，這嘛是臺灣本土代表性的藝術文化之一，毋過這馬布袋戲的 市場漸漸稀微。劇團近來注心共文化向下釘根，IN向望有閣較濟人願意來學習。 買湘瑩/編輯 -- ※ 發信站: 批踢踢實業坊(ptt.cc), 來自: 111.255.138.82 (臺灣) ※ 文章網址: https://www.ptt.cc/bbs/Gossiping/M.1720712255.A.43B.html